ជួយស៊ែរបន្ដផង ! មានករណីដាក់ថ្នាំសណ្ដំចាប់ក្មេងស្រីម្នាក់ ហើយចងដៃចងជើងបម្រុងវះយកគ្រឿងក្នុងលក់ តែត្រូវអ្នកភូមិឃើញទាន់ សូមប្រុងប្រយ័ត្នចំពោះកូនៗទាំងអស់គ្នា

ស្ទឹងត្រែង៖ កុមារីម្នាក់រស់នៅឃុំអូរស្វាយ ស្រុកថាឡាបរិវ៉ាត់ ខែត្រស្ទឹងត្រែង ត្រូវបានអ្នកភូមិប្រទះឃើញគេធ្វើទារុណកម្មចងដៃជើង កាត់សក់ និងប្រើថ្នាំសណ្ដំ។ ហើយនៅរសៀលថ្ងៃទី៥ ខែកុម្ភៈ ឆ្នាំ២០១៧ កុមារីរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកខែត្តស្ទឹងត្រែង។

សមត្ថកិច្ចស្រុកថាឡាបរិវ៉ាត់ នៅមិនទាន់សន្និដ្ឋានថាយ៉ាងណានៅឡើយទេ ព្រោះមន្ត្រីជំនាញកំពុងធ្វើការស៊ើបអង្កេត។ ចំណែកមេឃុំអូរស្វាយ សង្ស័យថា ការធ្វើទារុណកម្មកុមារីបែបនេះ បំណងសម្លាប់វះកាត់យកគ្រឿងក្នុងលក់។

មេឃុំអូរស្វាយ លោក រ័ត្ន ស៊ុន ឲ្យដឹងនៅថ្ងៃទី៥ កុម្ភៈ ថា អ្នកភូមិប្រទះឃើញកុមារីម្នាក់ត្រូវបានមនុស្ស ៥នាក់ធ្វើទារុណកម្មដោយចងដៃចងជើង បិទមាត់ និងប្រើថ្នាំសណ្ដំ កាលពីថ្ងៃទី០៣ កុម្ភៈ នៅគ្រាដែលឪពុកម្ដាយកុមារីនោះជាប់រវល់ការងារស្រែចម្ការ ហើយទុកកូននៅចាំផ្ទះ។ លោកថា ជនល្មើសបានរត់គេចខ្លួននៅពេលដែលអ្នកភូមិប្រទះឃើញពួកគេកំពុងធ្វើទារុណកម្ម។ ក្រៅពីនេះ ស្ថានភាពកុមារីរូបនោះមានបញ្ហាស្មារតី និងសុខភាពទ្រុឌទ្រោម បន្ទាប់ពីអ្នកភូមិបានជួយសង្គ្រោះភ្លាម និងបញ្ជូនទៅព្យាបាលនៅមន្ទីរពេទ្យ។

លោកសង្ស័យថា ករណីនេះអាចជាជនល្មើសចង់សម្លាប់កុមារដើម្បីវះយកបេះដូង ក្រលៀន និងឈាម ជាដើម ធ្វើអាជីវកម្ម ព្រោះតាមការពិនិត្យជាជំហានដំបូងរបស់សមត្ថកិច្ច ពុំឃើញមានស្លាកស្នាមរំលោភនោះទេ។

គួរបញ្ជាក់ថា នៅមុនពេលកើតហេតុ អ្នកភូមិប្រទះឃើញមនុស្សប្លែកមុខមួយក្រុមមានគ្នា ៥នាក់ ប្រើប្រាស់ម៉ូតូចំនួន ៤គ្រឿង ធ្វើដំណើរទៅមកក្នុងឃុំអូរស្វាយ។ តំបន់នោះជាប់ព្រំដែនប្រទេសឡាវ មានពលរដ្ឋរស់នៅជាង ២០០គ្រួសារ ស្មើនឹងពលរដ្ឋជាង ៨០០នាក់ ស្ថិតនៅទិសខាងកើតឆៀងខាងជើងនៃទីរួមខែត្រស្ទឹងត្រែង ឆ្ងាយពីទីរួមខែត្រជាង ៦០គីឡូម៉ែត្រ។

អធិការស្រុកថាឡាបរិវ៉ាត់ លោក សែម ស៊ីថា មានប្រសាសន៍ថា នគរបាលស្រុកបានទទួលពាក្យបណ្ដឹងនេះហើយ និងបានចាត់ឲ្យមន្ត្រីជំនាញចុះធ្វើការស្រាវជ្រាវ ហើយពុំទាន់អាចកំណត់អត្តសញ្ញាណជនល្មើសនៅឡើយទេ៕